الخميس، 29 أغسطس، 2013

30 /8

سلام عليكم ..

ازيكم كده ...
طبعا ربنا وحد يعلم ايه اللي ممكن يحصل النهاردة ... لهذا .. وبالرغم من أني مش عايزة اكتب بس حبيت اسيب كلمة قد تكون الأخيرة وقد لا تكون .. الله أعلم .. 

* اسمحولي ابدأها بــ شكر لا ينتهي لأستاذي / أحمد نصر .. يمكن لأن ربنا جعله سبب في أني ابدأ في التدوين أصلا .. عشان كده انا مديونة ليه بوجودي هنا .. ويارب أكون علي قد المسئولية .. وعلي قد الكلمات اللي بكتبها هنا .. 

* مش هتكلم أكيد في السياسة .. بس ادعو لمصر اليومين دول أووووووووي  ... 

* أحلامي من حوالي 3 أسابيع بتبدأ دايما بــ "قفزة" أو خليها نطة في البحر .. 
بتخيل دايما أني عشان ابدأ من جديد محتاجة أجري بسرعة علي "الجسر اللي بيبقي في نص البحرر واللي الناس بتقعد عليه وتدلدل رجليها في المية ويشوفوا الغروب من هناك ع البحر" .. المهم أني اجري بسرعة جداااااا وأقوم هوووووووووووب انط في المية .. 
لحظة الارتطام بالمياة بتفكرني باللحظات الحرجة اللي بتقابلنا في حياتنا واللي بتكون فاصلة جدا وقد تكون مسألة حياة أو موت ... بيعدي شريط حياتنا قدام عنينا مرة واحدة وكأنه فيلم سينيمائي سريع بيلخص كل تجاربنا بكل مشاعرها .. بنشوف الحقيقة مجردة ... حقيقتنا ... حقيقة النفس المتجملة اللي بتظهر للناس والانعكاس بتاعها جوانا ... بنشوف حقيقة الناس اللي عايشين معانا ... بنشوف معني الحياة وقيمتها ... 
بـــ نري الله .. ليس رؤية العين ولكن رؤية قلبية بتخشع فيها كل حياتنا وكل ذرة جوانا لوجوده ... 
اللحظة دي بتكون زي قلم كبير بناخده .. بيوجعنا صحيح .. بس بيفوقنا وبيخلنا نشوف صح ... مش نشوف اللي احنا عايزينه بس ... 
عشان كده البحر وحشني أوي . 

* نفسي آكل آيس كريم ... واشتري بلالين كتيييييييييييير وغزل البنات ... واقعد مع العيال الصغيرة في الشارع نلعب بالبلالين وناكل غزل البنات ونغيظ الكبار ونطلعلهم لسانا .. 
نقولهم أن الحياة متستاهلش كل الكراهية اللي فيكم واللي بتحاولوا تزرعوها في قلوب الأطفال من صغرهم وتكبروهم عليها ... 
نقولهم .. ارحمونااااااااااااااا ... احنا جايين الدنيا دي مش عشان نتعذب بسببكم ... ارموا كل تجاربكم ورا ضهركم لما تجيبونا وعلمونا معاني زي الحب والخير والحق والعدل ... 
صحيح الحياة مفيهاش المعاني دي .. وصحيح هنكتشف في الاخر ان دي كلها كدبة كبيرة كنتوا بتضحكوا يها علينا .. بس ع الأقل هنكون عيشنا يومين شايفين فيهم أن في حاجة في العالم ده تستاهل أننا نعيش فيه .. 


* الأرض تشرق من جديد ... 
فــ يا أيها الحالمون بــ"وطن" يسعكم .. استعدوا ... قد اقترب الحلم من أن يتحقق . 

* أحبكم جميعا .

ليست هناك تعليقات:

إرسال تعليق