الخميس، 22 أغسطس، 2013

رغي ...



بما أني أدركت مؤخرا أني عاملة المدونة دي عشان أرغي بس مش أكتر واطلع اللي جوايا واللي يمكن في كتير من الأوقات مش هقدر أقوله علي أرض الواقع .. "لأنه في العادة برده هيجرح ناس كتير وهخسر بسببه ناس كتير" .." لأننا شعب مصري ومبنحبش حد يقولنا الصح فين والغلط فين . ولا أننا غلطنا في حاجة ولازم نصلحها ولا أي حاجة تانية " .. احنا بنحب نمشي بدماغنا لغاية ما نرشق في حيطة وبعدين نرجع تاني .. مش عشان نبدأ بداية جديدة ولا حاجة ... ابسلوتلي .. عشان بس نمشي نفس الطريق من أول وجديد ونخبط في نفس الحيطة تاني وتالت وعاشر لغاية ما نموت وننتهي ولا كأننا عيشنا ولا شوفنا العيشة أصلا ...

ما علينا ..

المهم بقا أني قررت اخلي المدونة للفضفضة  .. طبعا مع بعض الكتابات اللي هزعجكم بيها من وقت للتاني واللي هيفيض بيها الوحي علي قلمي الحبيب ..
وبما أن آمالي في الكتابة بدأت "تنزوي" ..( من غير ما اعرف تنزوي يعني ايه ) .. وتعتزل الحياة وتنظلق هي الأخري في سبيلها ..
وبما أني برده حالفة ما هسيبها ولا هسيب القلم غير لما أموت ان شاء الله علينا وعليكم خير ..
فاعتقد أن الوقت جه عشان اقول اللي في نفسي كله ..
وطبعا كلنا شايفين حال البلد ومحدش ضامن عمره .. ف مش هينفع اموت وانا في قلبي كلمة ما قولتهاش ..
استعدوااااااااا للي جاي :)
وربنا يستر .. 

ليست هناك تعليقات:

إرسال تعليق