الخميس، 12 سبتمبر، 2013

رغي ..3


* لو خارجين في فسحة عادية .. ممكن تجيبلي آيس كريم أو تعزمني علي أكلة بحبها ... أما لو مناسبة مبتجيش غير مرة في السنة أفضل كتاب بحبه  .. ^_^
(معلومة تهمك) .. أو متهمكش .. مش هتفرق كتير لأني بجيبهم لنفسي ..

* بحب المطر .. وبكره الشتاء .. بحس أنه سجان بيحاول يمنعنا من متعة المشي في الشوارع بالليل أو السهر لوقت طويل فوق سطح بيتنا أو ... المتعة الكبري ... "البحر" ..
(معظم الناس بتعتبر ده غباء) .. عاااااااااااااادي علي فكرة مبحاولش أقنعهم بالعكس أهم حاجة أنا مبسوطة كده والدنيا ماشية ..

* في الغالب بكتب بصيغة "المذكر" .. ومع أني بكره الموضوع ده .. بس بستسهل ..
(سبحان الله) ..

* بتعامل بتلقائية شديدة لدرجة طفولية .. فتوقع مني أي رد فعل في أي زمان ومكان ... يعني مثلا ممكن تكون رئيسي في الشغل وطالب مني حاجات مهمة جدا وتيجي تسألني .. أقولك "شغل ايه !!!" ....
ممكن في نص الشارع أقف اتكلم نفسي بصوت عالي واحاول افتكر انا ناسيه ايه .. أو ممكن تلاقيني فجأة وانت غرقان في حوار مهم مش جنبك وتلاقيني قاعدة ع الرصيف أو ماشية علي طرفه وبلعب لعبة التوازن .. ممكن اكون قاعدة في وسط "عزاء" ويحصل موقف مضحك "أو حتي افتكر حاجة مضحكة" وتلاقيني بضحك من قلبي .. ولا الهواااااا .. وحاجات من دي كتييييييييييييير
(فلّة) .. الدنيا مش مستاهلة .. وممكن تقول قلة ذوق .. ولا هيفرق علي فكرة ..

* بحب الأكل ... ومع أني مش باكل كتير .. بس بستمتع وأنا باكل .. و دي حاجة لو تعلمون بتغيظ ماما جداااا  ,.. ومع اني باكل أسرع من أي بني آدم أعرفه أو معرفهوش "و دي برده بتخلي ماما هتقتلني" .. و ده بيتناقض تماما مع الاستمتاع بالأكل ... بس الأكل حلو مفيش كلام ^_^
(متحاولش تفهم) .. جرب تاكل باستمتاع ..

* مش بعرف اعبر عن نفسي بالكلام .. ولا بالكتابة ...! .. ومع أني في الغالب بكتب أي حاجة مش عارفة أقولها بس عمري ما وصلت إحساسي صح ..
(حاجة تخنق علي فكرة) ..

* شخصية خيالية جداااااااا .. ممكن اخترع فيلم عربي عن أي حاجة في الدنيا وأعيش كل لحظاته كاملة ... واعيّشك فيه .. وفي الآخر دي غلطتك عشان صدقت عيّلة زيي ..
(من غير زعل ^_*) ..

* الدنيا متستاهلش .. حقيقة علمية ثابتة .. بحاول اثبتها لكل الناس .. بس لسه مش قادرة اقنع نفسي بيها وأنا بتخانق مع أخويا الصغير اللي بيلعب في كتبي ... أو وأنا بحاول اثبت أحقيتي في أني أكمل الفيلم الأجنبي اللي قاعدة جنبه بقالي ساعتين وجت ماما قفلت التليفزيون علي آخر 10 دقايق وحلفت مانا مكملاه ...
(عيّلة ... مش بقولك) ..

 .... 

هناك 4 تعليقات:

  1. صدقيني مش عارف ارد عليكي ..

    ردحذف
  2. لييييييييييييييه بس ^_^
    احنا رافعين شعار قوووووول اللي في نفسك

    ردحذف
  3. الحياة لحظات بناء ممتعة .. استمري

    ردحذف