الخميس، 4 يونيو، 2015


العلاقات البشرية بشكل عام بتحتاج مننا مجهود عشان تستمر, فما بالنا بالعلاقات المهمة بالنسبة لنا, العلاقات اللي بتمثَّل قيمة في حياتنا واللي وجودها بيفرق فعلًا..؟!
بتحتاج مننا اهتمام.. ورعاية؛ زي النبتة الصغيرة اللي بنحاوط عليها عشان تكبر وتكون سليمة وجميلة..

في نفس الوقت.. أي علاقة في الدنيا بتكون مبنية على مبدأ "الأخذ والعطاء". مينفعش نفضل ناخد, أو العكس.. لأننا مع الوقت إما بنصبح مُستَهلكين ومش قادرين نواصل الطريق ده.. لأن مبقاش عندنا حاجة نضيفها في النطاق ده! أو بنكون جايبين آخر اللي معانا وبنتعامل معاهم بروتينية سخيفة!
...
النهاردة محمد كان بيتكلم عن علاقتنا بربنا.. وكان بيقول إن: مينفعش تكون علاقتنا بربنا مقتصرة على اتجاه واحدة بس.. زي الصلاة, أو الصوم أو غيرها.. لأن الشيطان لما يجي يضربنا في الطريق "الوحيد" ده, هنقع تمامًا..!
محتاجين نرتبط في طريقنا مع ربنا بأكتر من حاجة -على مستويات مختلفة- بس مينفعش يبقى خيط وحيد هو اللي طريقنا كله مبني عليه.

يا ترى العلاقات البشرية كده برده؟!
معرفش.. بس ساعات بنحتاج -مع الناس القريبة- إننا نغيَّر, إننا نبطل تقليدية وإتباع لنفس الخطوات في القرب أو البُعد أو الصمت أو غيره..
بنحتاج نفاجئهم.. نعرفهم إنهم قريبين.. إنهم مُهمِّين.
بنحتاج نجدد في علاقتنا عشان ميبقاش جوانا إحساس بأن ده أقصى ما يمكن الوصول إليه مع الشخص ده.. وإن كده النهاية!

أو يمكن بس, كل اللي بيكون مطلوب مننا نعمله, هو إننا نشوف الشخص اللي قدامنا بعيون جديدة بعيدًا عن توقعات فوق مستوى الخيال, أو خانات بنقسّمها ونحط فيها الناس بناءًا على اعتبارات غير واقعية بالمرَّة ...
إننا نُعيد رؤية الشخص اللي قدامنا بإضافة التفاصيل الجديدة اللي دخلت حياته, والتغيرات اللي حصلت في شخصيته ورؤيته للحياة ولينا جوه الحياة دي...
...

بعيدًا عن كل ده..
أنتوا وحشتوني :)

ليست هناك تعليقات:

إرسال تعليق